Â鶹Éç

Dechreuodd y diwrnod gyda'r partïon llefaru a'r cystadlaethau offerynnol.

Braf oedd cael gweld y fath dalent ymysg disgyblion Bl 7-9, roedd safon y cystadlu yn uchel iawn a'r rhai a gyrhaeddodd y llwyfan yn llawn haeddu cydnabyddiaeth am eu doniau.

Un o uchafbwyntiau'r diwrnod oedd yr unawdwyr a swynodd y dorf gyda'u lleisiau, llongyfarchiadau i'r tri.

Roedd y dawnsio a'r meimio eleni yn wreiddiol ac yn egniol a'r gynulleidfa yn mwynhau yn arw, gan symud i'r gerddoriaeth.

Roedd prif seremonïau y diwrnod yn llawn urddas a braf oedd gweld teilyngdod ymhob maes gyda nifer fawr o ymgeiswyr haeddiannol ond y goreuon yn dod i'r brig.

Hoffem longyfarch Cadi, Katie, Theo, Sian a Mared ar eu llwyddiannau ym mhrif gystadlaethau y diwrnod.

Cafodd y disgyblion eu syfrdanu wrth weld wynebau cyfarwydd eu hathrawon yn dawnsio yn wyllt ac yn meimio yn frwdfrydig i recordiau Cymraeg.

Anodd oedd eu hadnabod o dan y gwalltiau pinc ac oren a'r gwisgoedd trawiadol.

Wedi wythnosau o ymarfer caled, roedd y tri côr a oedd yn cynrychioli y tai yn barod i ganu ar ddiwedd y prynhawn.

Roedd fersiwn y corau o 'Ar adenydd brau y nos' yn amrywio o berfformiadau unsain i harmonïau swynol, gyda rhai corau yn ychwanegu cyfeiliant offerynnol.

Rhosyr oedd y côr buddugol, gyda Menai ac Aethwy yn 2il a 3ydd agos iawn.

Roedd safon uchel hefyd i'w weld yn yr Eisteddfod hyn a gynhaliwyd ar y pnawn Mercher.

Cawsom ein diddori gan yr unawdwyr piano dawnus, y grwpiau meimio a'r bandiau a greodd argraff fawr ar y gynulleidfa, gan fod y gerddoriaeth yn amrywio o fandiau roc i ddeuawd lleisiol ac offerynnol.

Menai a ddaeth i'r brig ar ddiwedd y dydd, ac roeddent yn llawn haeddu y fuddugoliaeth.

Hoffem ddiolch i'r holl athrawon am eu hymroddiad. Diolch hefyd i aelodau y chweched dosbarth am eu gwaith caled a'u brwdfrydedd ac yn olaf i'r holl ddisgyblion a gymerodd ran gan wneud yr Eisteddfod yn llwyddiannus eto eleni.