 |
 |
Beichiog yn Hong Kong
Mae hi'n rasus tai bach ar Beks sy'n feichiog yng nghanol arogleuon Hong Kong
|
Mae'r wythnosau diwethaf yma wedi bod yn rhai cymysg dros ben a minnau'n treulio hanner fy amser yn y gwely a'r hanner arall gyda fy mhen lawr y tŷ bach!!!
A dim ots lle mae'r tŷ bach - y Starbucks agosaf neu yn nhŷ ffrind. Mewn gwesty neu mewn siop ... allai ddim bod yn ddethol credwch chi fi!
Diolch i'r drefn mae rheswm teidi am hyn gan fy mod i'n feichiog!
A hynny ers deng wythnos, bellach, ac yn edrych ymlaen yn arw at fwrw'r tri mis er mwyn cael gwared â'r cyfogi erchyll a'r blinder di-baid.
Er hyn holl rydyn ni i gyd wedi cyffroi'n yn bost.
Yng nghanol bwydydd
HK sy'n cael y bai fy mod i'n teimlo mor sâl gan nad ydw i'n cofio teimlo hanner mor wael yn ystod wythnosau cyntaf cario, Ela.
Ond, yr adeg honno, doeddwn i ddim yn gweld pobol yn bwyta fish balls drewllyd a chicken's feet ar gornel strydoedd!
 Doedd yna ddim arogleuon ffrio bwyd Chineaidd yn dod o fflatiau cyfagos ychwaith a fu dim rhaid imi wynebu pysgod byw mewn tanciau yn yr archfarchnadoedd yn cael eu codi a'Iu lladd o fy mlaenI!
Yn wir, mae bwyd wedi troi'n elyn penna imi erbyn hyn gyda phethau fel dim sum, coffi, gwin a'r pethau rwyf fel arfer yn dwli arnynt, yn troi arnaf!
Melon a stwnsh ydi'r pethau sy'n fy nghadw'n hapus nawr - nid gyda'i gilydd, diolch i'r drefn.
Na - dwi heb gyrraedd y cyflwr lle dwi bron marw ishe bwyta glo Cymreig neu rywbeth tebyg!
Llawer o gwsg
Fel arall, mae bod yn feichiog yn HK wedi bod yn bleser yn awr bod y tywydd wedi newid dros y mis diwethaf gan ei gwneud yn bleser cael ymlacio gyda llyfr ar y to neu'n cysgu mewn hamoc a hithau ond tua 25 gradd.
Dwi di bod yn gwneud llawer o gysgu, credwch chi fi - yn ogystal, wrth gwrs, â pharhau wrth fy ngwaith.
Parti ar y to
Cefais gyfle i fynychu parti'r orsaf radio dwi'n gweithio iddi lle'r oedd Radio. 3 - RTHK (Radio Television Hong Kong) yn cyhoeddi logo newydd yr orsaf mewn parti coctel ar do theatr ynghanol y dre.
Roedd y tywydd yn berffaith gyda band jazz yn chware ar y to a nifer o bobol bwysig o'r llywodraeth yno.
Dyma'r parti cyntaf imi ei fynychu gyda Radio 3 ac roedd hi'n braf cael cwrdd â gwrandawyr oedd yn adnabod fy llais ond erioed wedi gweld yr wyneb tu ôl i'r llais ... pobol lwcus ag ydyn nhw!
Roedd yr holl noson yn fy atgoffa o'r Eisteddfod lle mae gwrandawyr yn holi eich perfedd am bopeth!!!
Gwerth chwech o griced
Cefais benwythnos brysur a chyffrous ar ddarllediad allanol mawr o ddegfed chwechawdau criced Hong Kong yng nghlwb criced Kowloon.
Mae hwn yn achlysur sy'n denu rhai o chwaraewyr criced gorau'r byd yn ogystal ag ambell un enwog o'r gorffennol.
Er enghraift, roedd Fred Truman yma yn gwylio'r criced ac yn hyrwyddo'i lyfr.
Roedd criw Radio 3 mewn lle go beryglus ... ar ochor y maes a bu bron imi â chael fy nharo â'r bêl sawl gwiath!
Yn darlledu am bedair awr roeddwn yn ofni mai yn yr ysbyty cyfagos y byddwn i gyda phennawd yn y South China Morning Post yn cyhoeddi: "Radio 3 pregnant presenter knocked for six at the 6's!"
Ta beth - rwyf nawr adref yn teipio hwn yn niogelwch fy stydi - ond esgusodwch fi; mae'r melon a'r stwnsh yn galw!
|
|
