 |
 |
Bali - blas ar baradwys
Beks yn sgrifennu am ei hymweliad ag ynys wirioneddol hudolus
|
Dydw i ddim yn earth mother o bell ffordd.
Ydw, dwi'n caru fy mhlant yn fwy nag unrhyw beth yn y byd ond dwi ddim yn ffan anferthol o fod yn feichiog!
Yn enwedig nawr bod y tywydd yn y tri degau uchel yn HQ.
Gall hyn fod yn ychydig o laddfa ar adegau ond ta waeth am hynny, dwi'n dod i'r casgliad y gall cael 'tan' ac edrych fel cneuen tra'n feichiog fod o help anarferol!
Diolch i'r drefn, cefais gyfle i roi cychwyn i'r 'tan' tra ar wyliau yn Bali dechrau Ebrill.
Er imi fyw yn Asia ers rhai blynyddoedd bellach ac ymweld â Thailand, y Philippines, China ac yn y blaen sawl gwaith roedd Bali yn lle newydd imi ac roeddwn wedi cynhyrfu'n bost cyn neidio ar yr awyren o HK am y pedair awr o daith.
 Er i Bali fod yn lle hynod o boblogaidd tu ymhlith trigolion HK bu llawer yn cadw draw oherwydd y bomiau diweddar.
Yn wir, lladdwyd yno nifer o aelodau Clwb Pêl-droed HK yr oedd Rod yn adnabod rhai ohonynt gan ein bod yn aelodau o'r clwb.
Mae pobol yn dal i sôn am y penwythnos erchyll hwnnw yn 2002 ac fel y byddech chi'n tybio gall sôn am Bali gyffwrdd teimladau.
Serch hynny, mae'n dal yn ynys sy'n hudo pobol gyda rhai o Brydain, Ewrop ac Awstralia yn heidio yno bob blwyddyn.
Gan fod triniaethau 'spa' o safon mor uchel mewn gwestai yn y rhan hon o'r byd nid oedd ond yn naturiol ein bod yn trefnu i aros mewn gwesty Spa safonol - yn enwedig a minnau'n bwriadu sbwylio fy hun yn llwyr a chael massage neu driniaeth debyg bron iawn bob dydd.
Wedi'r cyfan, rhaid cadw'r bwmp chwe mis yn hapus!!!
Fel popeth arall, mae triniaethau spa yn ofnadwy o ddrud yn Honkers ond dim ond hanner y pris mewn lleoedd fel Bali a Thailand!
Golff ar y meddwl
Roedd cynlluniau gwahanol iawn gan fy ngŵr - yn ymwneud â phêl fach wen, gron!
Yn Bali y mae un o gyrsiau golff gorau Indonesia ac yr oedd Mr James yn awyddus iawn i roi ei ffyn golff newydd ar waith yno.
Roedd ein gwesty dipyn o ffordd o Kuta a'i siopau, tai bwyta a chlybiau bishi a hefyd yn siwrne go dda o Nusa Dua lle mae llu o westai poblogaidd.
Yn wahanol i'r gwestai eraill roedd y Nirwana Golf Resort and Spa yng nghanol y caeau padi a'r terasau reis yn y mynyddoedd ac mewn ardal werdd iawn.
Y ddihangfa berffaith o brysurdeb HK!!!
Tawel ac addfwyn
Un o'r pethau cyntaf sy'n eich taro chi am Bali yw'r ffaith fod y bobol leol yn heddychlon iawn ac o natur addfwyn a thawel.
Mae'r iaith Falinaeg yn un eithaf hudolus i'r glust ac yn gwbwl wahanol i'r Gantonaeg galetach ei sain yr ydym ni'n ei chlywed o'n cwmpas.
Mae pobl Bali yn bobl hynod o grefyddol a themlau bendigedig ym mhobman ac yr oedd ein gwesty y drws nesa i un o'r rhai mwyaf cysegredig ar yr ynys - Tana Lot.
 Deuai'r ymwelwyr o bob man i weld yr haul yn machlud dros y deml hon - golygfa heb ei hail.
Bu'r cyfuniad o orffwys, triniaethau spa, bwyd Indonesaidd ac awyr iach yn berffaith a dychwelais i HK mor egniol yr oeddwn yn barod i ddringo Everest!
A da beth, hynny, gan fod gennyf jobin bwysig iawn i'w wneud - trefnu pen-blwydd Ela Mai yn bump!!!
Ond ble i ddechrau???!!! O na fyddwn yn earth mother!!!
Ond o leiaf rwyf nawr fam frown!!
|
|
