 |
 |
Llyncu arian - a disgwyl am newid!
Yng ngwres annioddefol Hong Kong rhaid i Beks Walters ruthro gyda dwy ferch fach i'r ysbyty!
|
Mae HK yn berwi.
Dwi'n berwi - ac mae'n waith anodd gadael y ty a'r air côn yng nghanol un o'r hafau twymaf erioed a hithau'n 37 gradd rai dyddiau!
Nid y tywydd delfrydol i fod yn rhedeg o gwmpas ynddo yn gwneud paratoadau munud olaf ar gyfer priodas!!!
Ta beth - rhaid clatsio bant! Ond ar ben hyn, mae gen i fy nith fach Beca Lia yn aros o'r Alban.
Dwbwl y trwbwl ...wrth iddi hi ag Ela Mai roi ambell i harten imi dros y pythefnos ddiwethaf.
Cawsom ambell i antur - gan gynnwys un yn cynnwys ysbyty!!!
Llyncu arian
Nid oedd Beca, sy'n bump, ond wedi bod yn HK am noson pan ddechreuodd yr helynt.
Roeddem ar y ffordd adre o'r archfarchnad leol yn hwyr nos Sul gyda'r ddwy fach yng nghefn y car pan glywais Ela yn tagu.
Gwyddwn, o'r swn, fod rhwybeth mawr o'i le a wedi stopio'r car gwelais fod golwg ofnadwy arni - yn tagu ac yn cael trafferth i anadlu.
Dywedodd Beca iddi llyncu darn o arian a chadarnhaodd Ela hynny - roedd hi wedi llyncu darn 20 cent sydd tua'r un faint ag 20ceiniog Cymru.
Wedi ffonio fy meddyg dywedodd wrthyf am fynd â hi i'r ysbyty yn syth.
Yn byw yma, rhaid diogelu rhag pob math o bethau na fydden yn eu hystyried yng Nghymru fel dengue fever, malaria, hep B ac yn y blaen.
. O ganlyniad cafodd Ela sawl brechiad egr sy'n golygu pob meddyg â nodwydd enfawr.
Ar ben hynny mae hi ofan ysbytai!
A dyna lle'r oeddwn iar fy mhen fy hun gyda'r ddwy fach oedd yn ar y ffordd I'r ysbyty.
Roedd Rod yn Phuket ar ei benwythnos stag felly doedd dim pwrpas ceisio cysylltu ag ef .Onid yw amseru dynion wastod yn berffaith??!!!
Hud a lledrith
Wedi cryn o berswâd llwyddais i gael y ddwy drwy'r drws a mynd ag Ela i stafell "y camera hud a lledrith!" pelydr x lle cadarnhawyd yn syth fod darn 20 cent yn ei stumog bach.
Diolch i'r drefn nid oedd yn beryglus bellach a dim posibilrwydd y byddai'n tagu.
Yn wir, dim ond un ffordd allan oedd i'r 20cent bellach a go brin fod angen dyfalu pwy gafodd y pleser o fynd drwy'r cwbwl lot i chwilio am yr arian!!
Ymhen tridiau yr ymddangosodd yr 20cent ac Ela nawr yn deall mai ond bwyd a diod ddylid eu llyncu a chadw unrhyw arian sydd ganddi yn ei phwrs!
Ta beth, bu'n hyfryd cael Beca yma i'w thywys o gwmpas Honkers - er gwaethaf y gwres.
Cafodd y ddwy fach eu ffitio ar gyfer eu ffrogiau priodas ac ers hynny mae nhw wedi bod yn erfyn arnaf adael iddyn nhw eu gwisgo adref.
Gallwch ddychmygu'r peth - dwy dan bump yn cerdded drwy ganol Honkers mewn dillad flower girl.
Teithio i Gymru
Mae'n ty ni bellach fel storfa enfawr gyda phethau'n cael eu casglu ar gyfer y trip i Gymru a minnau'n teithio ar fy mhen fy hun gydag Ela, Beca, dillad priodasol pawb, llwyth o bethau priodasol, a dillad am bum wythnos.
Byddaf yn archebu G 'n T enfawr o fewn deng eiliad i take off credwch chi fi!
Bydd y briodas ymhen ychydig dros bythefnos a minnau wedi cyffroi'n bost yn methu disgwyl gweld fy holl ffrindiau unwaith eto a threulio cymaint o amser bosib gyda fy nheulu a gweld eglwys fach Mwnt unwaith eto.
Byddaf hefyd yn dathlu fy mhen-blwydd tra yng Nghymru ... a hynny'n rhywbeth nad wyf wedi'i wneud gyda mam ers dipyn.
Dwi hefyd yn edrych 'mlaen at ddianc o'r gwres 'ma a cherdded allan drwy'r drws heb fod yn chwys domen ... nid yr edrychiad mwyaf delfrydol ar gyfer unrhyw briodferch-i-fod
Byddaf yn ysgrifennaf fy ngholofn olaf fel Miss. Walters o Gymru mewn pythefnos!!!
|
|
