Mis Mai wedi hedfan heibio gyda phopeth sydd wedi bod yn mynd ymlaen. Athro Daearyddiaeth 'di gofyn i ni siarad â dosbarth naw am wledydd Ewrop a'u heconomïau - Helen na fi a dim syniad am beth i siarad felly bu'n rhaid i ni fynd i lyfrgell yr ysgol i ffeindio rhywbeth.
Ffeindiais i lyfr cyfan ar Gymru yn llawn traddodiadau a hanes y wlad a hyd yn oed lluniau o Aberystwyth! Penderfynais ddangos y llyfr i'r plant. Yr wythnos ganlynol cawsom ein gwahodd i siarad eto. Y tro hwn i siarad amdanom ni ein hunain, trafod y rhesymau i ni ddod i India i weithio a thrafod ein bwriadau ar gyfer y dyfodol - hyn oll er mwn ceisio ysbrydoli'r plant! Roedd y sgwrs hon yn rhan fechan mewn nifer o weithgareddau oedd yn mynd ymlaen dros y penwythnos i'r blynyddoedd hÅ·n.
Roedden nhw i gyd yn aros yn yr ysgol dros nos ac yn gwylio ffilmiau, rhannu storïau, jôcs a thalentau a chwarae gemau. Roedd y plant iau yn cael mynd am bicnic am y dydd! Fe es i gyda blwyddyn 3 a 4 i barc mawr heb fod yn rhy bell o'r ysgol. Eisteddon ni i gyd i lawr i fwyta ac wedyn buon ni yn chwarae gemau am weddill y pnawn; bues i'n chwarae criced a phêl droed gyda'r bechgyn a 'duck, duck, goose' gyda'r merched.
Roedd yna 'Mela' ymlaen yn nheml Dungri am dridiau yng nghanol y mis. Gŵyl Hindwaidd yw'r Mela pryd maen nhw'n addoli'r duwiau. Roedden nhw'n aberthu geifr yn y bore ac yn y pnawn roedden nhw yn addoli'r duwiau gyda cherddoriaeth. Byddai'r dynion i gyd yn dawnsio'r ddawns leol tra bod y menywod yn eistedd a gwylio. Cafodd byfflo ei aberthu ar y diwrnod olaf. Roedd yna lawer o stondinau yna yn gwerthu pob math o bethau.
Roeddwn ni wedi gwneud ffrindiau da gyda'r athrawes feithrin, roedd ei gŵr hi newydd agor tŷ^ coffi yn Hen Manali ac wedi gofyn i mi beintio tri addurn wal i roi i fyny yn, felly fe dreuliasom y penwythnos yn creu'r rhain gyda phaent ar ddefnydd. Fe wnaethon ni dri llun - cwpan coffi, llaw a llygaid - gan ddefnyddio patrymau mehendi i greu'r lluniau. Cawsant eu fframio a'u hongian yn y caffi, ac yn ôl Rajan roedd llawer o dwristiaid wedi bod yn tynnu lluniau ohonyn nhw a wnaeth un ferch wario tair awr yn eu copïo ar bapur!
Ar y penwythnos olaf ym mis Mai fe wnaethon ni'r daith pedair awr ar ddeg ar y bws lleol i Shimla i weld un o'r merched eraill oedd yn gweithio mewn ysgol i ferched. Cawsom wythnos fendigedig; mae Shimla yn le braf iawn, dyma oedd canolfan weinyddol India pan oedd y wlad o dan reolaeth y Raj Prydeinig. Roedd y tywydd yma'n llawer mwy ffafriol i'r Prydeinwyr ac roedd yr ymdeimlad Prydeinig yn amlwg yma - roedd hi'n anodd dychmygu eich bod yn India o gwbl!
Ar y penwythnos cyntaf ym mis Mehefin cawsom bicnic staff. Aethon ni i gyd i aros dros nos mewn lle o'r enw Kothi a oedd tuag awr i ffwrdd. Cafodd y noswaith ei threulio yn bwyta, canu, dawnsio a chwarae gemau! Trannoeth roedd gennym ddewis naill ai aros yn Kothi a mynd am dro o amgylch y dre neu i fynd i fyny Bwlch Rhatang. Fe benderfynais fentro'r bwlch a dringo pedair mil o droedfeddi i gyrraedd rhyw lyn oedd yng nghanol y mynyddoedd. Dim ond pump ohonom aeth ar y siwrnai - y dirprwy brifathro a'i ferch, dau athro chwaraeon a minnau. Cawsom ddiwrnod gwych er i ni gael siom o beidio â chyrraedd y llyn - roedd y glasier yn rhy beryglus i'w chroesi.
Treuliasom y bythefnos olaf yn mynd o dÅ· i dÅ· yn swpera gyda phobl oedden ni wedi dod i adnabod dros y pedwar mis a chawsom ambell i wers goginio! Fe wnaethon ni hefyd benderfynu addurno darn o wal neuadd yr ysgol, murlun o ddinosoriaid!
Wel daeth y pedwar mis i ben. Roedd hi'n drist gadael yr ysgol, y plant a'r holl ffrindiau newydd roedden ni wedi dod i'w hadnabod mor dda. Roedd yn deimlad gwa¬hanol iawn i adael adre oherwydd gwyddwn ymhen pum mis y buaswn yn gweld fy nheulu a ffrindiau unwaith eto ond yma doedd gen i ddim syniad a welwn i fy ffrindiau newydd byth eto. Er hynny, roedd y rhan fwyaf cyffrous o'r daith i ddod.
Fe aethon ni gyntaf i Amritar i weld y Deml Euraidd ac yna i Agra i weld y Taj Mahal. Hedfan wedyn i Kerela sydd reit yn ne India, treulio wythnos a hanner yma yn teithio o gwmpas a chael cyfle i aros ar gwch yn y cilfachau, gweld ras cychod nadroedd ac eistedd ar y traeth er nad oedd hi'n braf iawn gan ei fod yn dymor y monsŵn! Yna mlaen i Goa gan dreulio wythnos yn ymlacio, tylino'r corff a gwylio Katakali - dull o adrodd stori trwy ddawns gan ddefnyddio symudiadau dwylo, wyneb a llygaid. Hedfan yn ôl o Delhi wedyn a symud ymlaen i Rajastan am yr wythnos olaf, wythnos brysur yn gweld yr holl olygfeydd, gwneud lot o siopa, mynd ar daith camel a gwario noswaith yn yr anialwch, cyn dal trên nôl i Delhi am y tro olaf a hedfan adref!
Ìý
