Â鶹Éç

Ddydd Sadwrn, cychwynnodd y cystadlu am 10 gan orffen yn daclus am 5 y prynhawn. Roedd Neuadd Ysgol Dyffryn Ogwen dan ei sang trwy'r dydd a phawb yn gadael ar yr un pryd wedi i'r corau gloi cystadlu'r dydd.

I'r rhai ohonoch a ddaeth i Neuadd Ogwen nos Wener, 20 Tachwedd, rwy'n siŵr y byddech yn cytuno bod y gynulleidfa wedi cael gwledd o'r dechrau i'r diwedd.

Gan fod yr Eisteddfod yn cynnig gwobrau mawr eleni ar y nos Wener, fe lwyddodd hynny i ddenu cystadleuwyr talentog iawn o bell ac agos.

Hefyd, roedd yn dda gweld ein talentau lleol yn serennu ar y llwyfan yn y cystadlaethau.

Teithiodd pedwar côr i Ddyffryn Ogwen i gystadlu yn erbyn ein corau lleol, Cororion a Chôr Meibion y Penrhyn a chafwyd noson o gystadlu gwerth chweil.

Yng nghanol y cystadlu nos Wener, cynhaliwyd seremoni'r Orsedd a da oedd gweld teilyngdod ym mhob un o'r categorïau llenyddol i goroni'r noson.

Yn ôl Lowri Roberts, Ysgrifennydd y Pwyllgor, "Mae hyn wedi bod yn garreg filltir bwysig yn hanes yr Eisteddfod leol.

"Rydym wedi llwyddo i chwyldroi'r Eisteddfod gan fynd o niferoedd cynulleidfaol bychan a siomedig a diffyg cystadlu i neuadd lawn gyda nifer dda o gystadleuwyr - rhai lleol a rhai sydd eisoes wedi llwyddo ar lwyfan cenedlaethol.

"Cawsom feirniaid adnabyddus megis Robart Arwyn a Maldwyn John hefyd.

Mae'n rhaid anelu'n uchel i lwyddo. Roedd bwrlwm nos Wener yn fendigedig - dyma'r ffordd ymlaen yn sicr."

Meddai'r Cadeirydd, Siân Esmor Rees, "Ar y cyfan, rwy'n teimlo bod y drefn newydd wedi gweithio'n eithriadol o dda.

"Mi wnaethon ni lwyddo i ddenu cystadleuwyr o safon uchel iawn ac roedd nos Wener yn noson o adloniant i'r gynulleidfa.

"Roedd Eisteddfod y plant ar y dydd Sadwrn yn llwyddiant mawr unwaith eto."