Â鶹Éç

Fei'i henwebwyd ar gyfer y gystadleuaeth gan Dez ac Ali Quarrelle o 'Mythstories', yr amgueddfa adrodd stori yn Wem, Sir Amwythig, wedi iddynt ei gweld yn perfformio.

Cafodd 120 unigolion o Brydain eu henwebu, a bu'n rhaid iddi anfon ei phortffolio at y beirniaid yn ogystal a CD ohoni'n adrodd stori.

Ar ôl ystyried gwaith yr ymgeiswyr ac ar ôl gwrando ar eu perfformiadau, dewiswyd Catherine ynghyd a thri storïwr arall i fynd Theatr y Barbican yn Llundain i berfformio o flaen y beirniaid a chynulleidfa.

Gofynnwyd iddi berfformio'n ddwyieithog a chafodd y gynulleidfa ganu cytgan Gymraeg cyn iddi ddechrau ar ei stori.

Mae'n debyg fod y beirniad wedi rhyfeddu fod Catherine yn gallu perfformio'n ddwyieithog, ac yn gallu newid o'r Gymraeg i'r Saesneg mor rhwydd a naturiol.

Cyflwynwyd y wobr iddi gan Annie Lennox, a oedd yn arfer bod yn brif leisydd yr Eurythmics.

Ychydig o'i hanes

Fe'i ganed ym Mangor ac ar ôl cyfnod ym Miwmares, symudodd gyda'i theulu bump o weithiau i wahanol ardaloedd gan fod ei thad yn gweithio mewn banc ac yn gorfod symud gyda'i waith.

Graddiodd mewn drama ym Mhrifysgol Aberystwyth a gweithiodd fel actores i sawl cwmni gan gynnwys Theatr Bara Caws, cyn dychwelyd i'r coleg i wneud ymarfer dysgu a chymhwyso'n athrawes.

Yna daeth ei nain, Mrs Malan Williams, ar draws hysbyseb yn y 'Cambrian News' am storïwr yn Llyfrgell Caernarfon.

Y bwriad oedd annog plant i ddarllen mwy a defnyddio mwy ar y llyfrgell.

Bu Catherine yn y swydd am bum mlynedd, a bellach mae'n gwneud y gwaith ar ei liwt ei hun, ac wedi perfformio mewn sawl gwlad.

Llongyfarchiadau mawr iddi.