|
Dyma flaen ffrwyth blynyddoedd o ddyheu ac ymdrech gan gyfarwyddwyr a staff Antur Penllyn; ar adegau edrychai'n ddu ond dyfal donc ... Dyma adnodd newydd unigryw i drigolion Penllyn a buddsoddiad ariannol sylweddol iawn a ddaw ag ymwelwyr ac elw i fusnesau'r ardal.
Mae'r adeilad unigryw hwn, a gynlluniwyd gan y pensaer Huw Owen, yn ymgorfforiad o weledigaeth gynnar yr Antur, sef cryfhau economi Penllyn a chryfhau ymwybyddiaeth ei thrigolion o werth eu treftadaeth yn ddiwylliannol ac yn ariannol.
O'r dechrau rydym wedi ystyried y Gymraeg yn adnodd cyn bwysiced â Llyn Tegid a'r Aran at ddiben denu ymwelwyr i Benllyn. Mae yna filoedd o ddysgwyr a theuluoedd Cymraeg ar hyd ac ar led y wlad nad ydynt yn cael cyfle i ddefnyddio'r iaith yn gymdeithasol; ein neges ni yw "Ewch i Nant Gwrtheyrn i ddysgu'r iaith, dewch i Benllyn i'w defnyddio!" Araf fu ymateb busnesau'n gyffredinol i'r alwad am "bapur wal Cymraeg" yn mannau cyhoeddus y Bala, faint o fwydlenni Cymraeg sydd i'w gweld ar y Stryd Fawr? Hawdd beio perchnogion busnes ond rydym ni'r cyhoedd ar fai hefyd nad ydym yn mynnu gwell gwasanaeth.
Beth wnelo hyn â Chanolfan Cywain? Mae'r Ganolfan yn ffocws i hunaniaeth Penllyn a hefyd yn ganolbwynt i syniadau newydd ym myd busnes. Mae'r ddwy elfen yn uno'n drawiadol yng ngwaith Huw Owen. Does bosib osgoi'r cysylltiad. Ymhlith y gweithgareddau a fydd yn cael eu trefnu gan y staff bydd digwyddiadau wedi eu hanelu'n benodol at ddysgwyr y Gymraeg, yn blant ac oedolion.
Mae cryfder y Gymraeg ym Mhenllyn yn allweddol i'r weledigaeth ac i'r perwyl hwn mae'r Antur, efo cefnogaeth Bwrdd yr laith, wedi bod yn gweithredu cynllun cymathu mewnfudwyr di- Gymraeg ers blwyddyn a hanner. Rydym yn ymweld a chartrefi, esbonio cefndir ieithyddol yr ardal a'i hanes ac annog y mewnfudwyr i ddysgu'r iaith a dod yn rhan o'r gymuned. Bu'r ymateb yn gadarnhaol, rhai yn mynd ati i ddysgu, eraill yn methu am amrywiol resymau ond pawb bron yn cydnabod lle'r Gymraeg ac yn adnabod eu lle fel mewnfudwyr. Yn anffodus, am resymau ariannol, daeth nawdd Bwrdd yr laith i ben ond mae Canolfan Cywain yn cynnig cyfle i ni barhau a'r gwaith a threfnu rhaglen o ddigwyddiadau a fydd yn dod a'r brodorion a'r "Cymry newydd" at ei gilydd.
Ydych chi wedi bod draw am dro i Ganolfan Cywain? Mae yna lawer i'w weld - yr adeilad rhyfeddol a'r gwaith celf oddi allan i gychwyn... Oes mae yna un freuddwyd wedi ei gwireddu ond mae yna freuddwydion eraill a'r pennaf un yw diogelu dyfodol y Gymraeg ym Mhenllyn drwy greu gwaith i'n pobl ifanc i'w cadw yma a chymathu'r mewnfudwyr. Ydych chi'n cytuno? Ymunwch â ni yn Antur Penllyn i ysgwyddo'r cyfrifoldeb - mae pleser mawr i'w gael o wireddu breuddwydion!
 |
Ìý
