Ymgyrch yw hi i berswadio'r cyhoedd i ddefnyddio mwy o'r iaith Gymraeg yn eu bywydau bob dydd, gan eu hannog i ddefnyddio "Cymraeg yn Gyntaf!"Mae Bwrdd yr Iaith Gymraeg, mewn partneriaeth â Mentrau Iaith Cymru ac Antur Penllyn, yn targedu nifer o ardaloedd penodol yng Nghymru fel rhan o'r ymgyrch, ac mae'r Bala yn un ohonynt. Bydd y Bwrdd yn darparu nifer o adnoddau "Cymraeg yn Gyntaf" am ddim gan gynnwys posteri, sticeri, baneri, balŵns, arwyddion cownter a beiros.
Hefyd, i dynnu cymaint o sylw ag sy'n bosibl, byddwn ni'n hysbysebu ar fysus lleol, yn trefnu digwyddiadau lleol ac eitemau o ddiddordeb yn y wasg a'r cyfryngau. Rydyn ni'n gobeithio creu tipyn o fwrlwm yn ystod yr wythnos!
Eisoes, mae gweithgor lleol wedi ei sefydlu i drefnu'r ymgyrch, a gyda'ch cefnogaeth chi, gallwn edrych ymlaen at ymgyrch gyffrous fydd yn arwain at gynyddu'r defnydd o'r iaith Gymraeg yn Y Bala a'r ardal.
Digwyddiadau
Cynhelir Gig Gŵyl Ddewi nos Wener 27ain o Chwefror yng Nghlwb Golff y Bala i ddechrau'r wythnos gyffrous a bydd Sara Mai a'r Moniars a Bysedd Melys yn perfformio yno. Yn ogystal, bydd Sali Mali yn mynd o amgylch cylchoedd Ti a Fi yn ystod yr wythnos gyntaf yn mis Mawrth gan gynnal sesiynau crefft, stori a chan gyda'r plant.
Cynhelir cystadleuaeth Gŵyl Ddewi lle rhoddir gwobr o £100 i'r Ffenestr Siop sydd wedi ei haddurno orau ar gyfer dathlu Gŵyl Ddewi. Bydd gornest fawr rhwng Clybiau Ffermwyr Ifanc Penllyn yn yr Eisteddfod Dafarn yn Plas Coch.
Bydd Cymdeithas y Dysgwyr (CYD) yn cynnal noson o gêmau iaith yn y Llew Gwyn nos Iau, 4ydd o Fawrth.Digwyddiadau eraill a gynhelir yn ystod yr wythnos honno ac sydd yn anghysylltiedig ag Antur Penllyn yw Eisteddfod yr Annibynwyr ac Eisteddfod Cylch yr Urdd. Hefyd, bydd Theatr Bara Caws yn dod i Ysgol y Berwyn. Digwyddiadau ydynt sy'n hyrwyddo'r diwylliant Cymraeg, ac sy'n arwydd o'r cyfoeth o ddiwylliant sydd yn yr ardal.
Ond nid ymgyrch yw hon sydd am i bobl ddechrau pob sgwrs yn y Gymraeg yn ystod yr wythnos honno'n unig, ond yn hytrach ymgyrch i sbarduno pobl i ddefnyddio'r Gymraeg yn gyntaf o hyd.
Os hoffech gael gwybodaeth bellach ynglŷn â'r ymgyrch, cysylltwch ag Awel Mehefin Edwards (Swyddog Iaith Antur Penllyn) ar 01678 520920.
Wythnos 'Cymraeg yn Gyntaf' 1 7 Mawrth 2004-02-27
Ìý
