 |
I'r ddalen flaenorol
Dod a'r newyddion da i bobl gyffredin
Sylwadau y Parchedig Guto Prys ap Gwynfor
neu darllenwch beth oedd ganddo i'w ddweud, isod:
I bwy y bwriadwyd y newyddion da am eni Gwaredwr y byd?
Mae synnwyr cyffredin, sydd wedi ei lunio gan ein diwylliant poblogaidd, yn dweud taw y bobol rymus sy'n effeithio ar ddatblygiad ein byd a ddylai dderbyn gwybodaeth fel hyn.
Onid y pwerus a'r cyfoethog sydd wedi bod yn rhedeg y byd yma erioed?
Nid yw'r natur ddynol wedi newid ar draws y miloedd blynyddoedd, byddai pobol Jwdea wedi meddwl yr un ffordd pan aned Iesu ym Methlehem.
Saif Bethlehem o fewn ychydig filltiroedd i Jerwsalem, pellter cerdded hawdd.
Yn Jerwsalem yr oedd y sefydliadau gwleidyddol a chrefyddol Iddewig wedi eu canoli - yn y fan honno yr oedd y bobol bwysig yn byw.
Yn ôl y ffordd ddynol o feddwl gellid tybio taw at y rhain y byddai'r negesydd wedi dwyn y newyddion am eni Gwaredwr.
Rhain oedd y dosbarth oedd yn llywio bywydau pobol, yn gwneud y penderfyniadau pwysig fyddai'n effeithio ar fywydau pawb arall. Rhain oedd â'r cyfoeth a'r grym. Onid at y rhain y fyddai'n synhwyrol i gyflwyno'r wybodaeth am y newid sylfaenol oedd i ddod?
I'r meysydd nid y ddinas
Nid felly y bu ac nid i'r fan honno y cymerwyd y neges am eni Gwaredwr, yn ôl Luc, ond i feysydd Bethlehem lle'r oedd bugeiliaid yn gwarchod eu praidd liw nos.
Pobol gyffredin oedd y bugeiliaid; yn wir, nid yn unig eu bod yn bobol gyffredin ond yr oeddent yn perthyn i haenau isaf y gymdeithas. Nid oedd gan y boblogaeth yn gyffredinol fawr o barch tuag atynt, ystyriwyd hwy fel gwehilion brwnt a diwerth. Dynion oeddent na ellid dibynnu arnynt ac a aeth yn fugeiliaid am na allent gael unrhyw swydd arall. Byddech feddwl taw'r siort yma o bobol fyddai'r olaf i dderbyn newyddion o'r fath bwysigrwydd.
Troi gwerthoedd dyn wyneb i waered
"Yr olaf a fyddant flaenaf...", meddai Iesu; a rhan o neges y Nadolig yw'r gwirionedd rhyfeddol hwn - mae Duw yn troi gwerthoedd dynol wyneb i waered.
Yn llety'r anifail, yng nghanol y dom a'r llaca a'r drewdod y ganed Gwaredwr y Byd; dod i ganol realiti brwnt bywyd a wnaeth. A'r dosbarth mwyaf cyffredin y gallwch feddwl amdano oedd y cyntaf i dderbyn y newyddion da o lawenydd mawr sydd i'r holl fyd.
Fel Moses
Y mae elfen bwysig arall yn perthyn i hanes Luc; a rhaid troi i'r Hen Destament eto er mwyn cael yr arwyddocâd llawn o'r hyn a ddywed.
Tra'n bugeilio'i ddefaid y cafodd Moses ei weledigaeth o Dduw yn y berth yn llosgi.
Ar y pryd yr oedd yntau yn byw ar gyrion cymdeithas fel ffoadur o'r Aifft.
Bugail oedd Dafydd, a ystyriwyd fel y lleiaf galluog o feibion Jesse, yr oedd ar gyrion ei deulu ei hun fel petai.
Ef, y lleiaf a'r gwannaf o'r bechgyn, yr un a ddewiswyd i gyflawni'r gwaith â'r lleiaf o anrhydedd yn perthyn iddo, ef yw'r un a eneiniwyd gan Samuel i fod yn arweinydd i'r genedl.
Ydy, meddai Luc, y mae Duw yn caru ac yn gwneud defnydd o'r rhai a ystyrir gan y gymdeithas yn gyffredinol yn ddiwerth.
Dweud wrth eraill
Mae'r bugeiliaid yn hanes Luc yn ymateb yn greadigol i'r newyddion da am eni Gwaredwr y Byd, maent yn mynd i ddweud wrth eraill am y digwyddiad. Nid yw tystio yn y modd hwn y tu hwnt i allu unrhyw un ohonom sydd yn yr oedfa hon neu adref yn gwrando.
Rhan o wendid affwysol yr eglwysi y dyddiau hyn yw'r ffaith nad ydym ni, y bobol gyffredin, yn fodlon mynd ati i sôn wrth eraill am gariad Duw fel y gwelwn ef yn Iesu.
Dyrchafu'r distadl
Rhan o bwyslais a welwyd yn y Magnifficat, a gyflwynwyd gynnau yw'r modd y mae Duw yn dyrchafu'r distadl drwy ymddiried ynddynt. Merch dlawd o deulu cyffredin oedd Mair a ddewiswyd, yn ôl ei thystiolaeth ei hun, oherwydd i Dduw "... ystyried distadledd ei lawforwyn".
Newyddion da i ninnau yw'r wybodaeth hon, oherwydd fod Duw yn caru pobol gyffredin fel ni.
Cliciwch i ddychwelyd i brif ddalen Oedfa Hermon ac i ddarllen cyflwyniadau eraill draddodwyd yn ystod y gwasanaeth.
I'r ddalen nesaf
|
|
Ìý
