Â鶹Éç

Ray Gravell oedd yno i gwrdd â'r plant ar y dydd Mawrth. Roedd wrthi'n cyflwyno'i raglen frecwast ar Radio Cymru, tra roedd y selsig Gwyddelig yn coginio. Daeth tad un o blant yr ysgol (Gwyddel yn wreiddiol) i siarad â'r plant. Bu llawer o holi prysur am fara soda ac am gacennau tatws. Ar ôl y brecwast aeth y plant i sgwrsio â phlant Iwerddon trwy ddefnyddio system `First Class'. Trefnwyd y sgwrs yn dilyn ymweliad gan aelodau o staff yr ysgol â'r Iwerddon er mwyn creu cysylltiadau gydag ysgol yn Nulyn. Bu llawer o chwerthin wrth i blant Carwe holi'r plant am eu gwlad ac ateb cwestiynau ar Gymru.

Gwelwyd baneri'r Almaen yn hedfan ar y dydd Mercher wrth i'r plant gael cyfle i flasu brecwast traddodiadol Almaenig. Cig wedi'i sychu, bara a jam oedd ar y fwydlen. Daeth Haika Griffiths (Almaenes leol) i siarad â'r plant am fwyd, pobl ac ysgolion yr Almaen.

Gorffennwyd yr wythnos ar y dydd Iau gyda (yn ôl rhai o'r plant) brecwast gorau'r wythnos - brechdan bacwn i gynrychioli Denmarc. Cafodd y plant hwyl a sbri wrth greu modeli allan o Lego. Efelychwyd gweithgaredd `First Class' ddydd Mawrth hefyd ond gyda phlant Denmarc y tro hwn. Eglurodd disgyblion Ysgol Carwe i blant Denmarc eu bod yn hoff iawn o frechdanau bacwn a chytunodd y Daniaid.

Ar ôl wythnos lwyddiannus, roedd dealltwriaeth y plant wedi ei ddatblygu, ac roedd llawer o ddisgyblion yn holi pryd oedd yr wythnos nesaf o'i thebyg. Profodd rhai o'r plant fwyd nad oeddynt erioed wedi ei flasu (ac yn ôl rhai - ar ôl blasu'r cig wedi'i sychu, byth eisiau ei flasu `to!)

Creodd plant yr ysgol gysylltiadau â phlant Iwerddon a phlant Denmarc, ac maent yn edrych 'mlaen i gynnal 'sgwrs' eto yn fuan. Mae cardiau Nadolig oddi wrth y plant yn gweithio'u ffordd i'r Iwerddon ac i Ddenmarc, ac mae'n wir i ddweud mai nid dim ond y parsel gwreiddiol fydd yn cael ei basio o hyn ymlaen, ond digonedd o lythyron, gwaith, dymuniadau, a phrofiadau gwerthfawr.