Â鶹Éç

Rugadh Niall Moireasdan, bàrd Phabaigh neo Bàrd Chleite na Dubhchadh, bho chionn còrr is dà cheud bliadhna ann an Sgarastadh Bheag, dìreach beagan mhìltean bhon t-seann dachaigh aig Ceitidh Anna NicChoinnich ann a Horgabost sna Hearadh.
B’ ann ri cìobaireachd chaorach a bha Niall fad a bheatha 's chuir e seachad bliadhnaichean ann an Eilean Phabaigh ag obair do na Stiùbhartaich aig an robh an t-eilean aig an àm. Sin far an do rinn e mòran de na h-òrain ‘s ainmeile aige mar ‘Òran a’ Chianalais’ agus ‘Òran an Eagail’. Chaidh suas ri fichead de na h-òrain aige fhoillseachadh ann an Leabhar nan Gleann ann an 1898. B’ e fear Seòras MacEanraig a chruinnich iad ‘s e air tadhal air Mòr, nighean a’ bhàird anns an dachaigh teaghlaich aca, a bha an uair sin ann an Cleite na Dubhchadh.

Tèile aig an robh ùidh mhòr anns a’ bhàrdachd aige, agus a fhuair èolas air Mòr a’ Bhàird mun àm sin, 's i Seònaid 'an 'ic Ailein à Liceasto - seanmhair Dhòmhnaill Dhòmhnallaich air taobh a mhàthair. S' esan Dhòmhnaill Shàm a tha a' fuireach an ath dhoras do sheann dachaigh Ceitidh Anna ann a Horgabost. Tha e coltach gun robh cuimhne mhìorbhaileach aig Seònaid, ‘s gu dearbh tha sin air leantainn anns na daoine.

Mar sin, cha robh duine na b'fheàrr na Dòmhnall Shàm airson sgeulachd a' bhàird Phabach no Bàrd Chleite na Dubhchadh innse do Cheitidh Anna - neo airson na h-òrain aige a sheinn.