Â鶹Éç

Tha dìleab làidir de bhàrdachd ann am Barraigh. Aig cuirmean agus cèilidhean air feadh na dùthcha ‘s iomadh òran a bhithear a’ seinn a chaidh a dhèanamh le bàrd Barrach.

Nam measg bha Dòmhnall Iain ‘Tair’ MacDhùghaill nach maireann. Rugadh e am Barraigh ann an 1921, agus b‘ e a sgrìobh òrain ainmeil leithid Feumaidh Mi Tilleadh a Bharraigh, agus Oitir Bagh Bhatarsaigh – neo Sands of Vatersay, mar a thug e air sa Bheurla.

Ach bhiodh e ri fada a bharrachd na òrain cèilidh a-mhàin. Choisinn e Crùn a' Bhàird ann an 1968, agus bhiodh e ri sgrìobhadh òrain air fuinn bho air feadh an t-saoghail. Tha Coinneach Mac a’ Ghobhainn a’ bruidhinn ri Màiri Agnes NicFhionghain, a thogadh an ath-dhoras do Dhòmhnall Iain, agus a chlàr mòran dhe na h-òrain aige air tèip; Mairead NicNèill, a bha còmhla ri Màiri Agnes ann am buidheann ciùil a chur Dòmhnall Iain air dòigh an Glaschu; agus Calum MacNèill, aig a bheil deagh chuimhne air cuideachd Dhòmhnaill Iain an Glaschu.

Tha cothrom a seo èisteachd ri sgeulachd a bheatha, agus na h-òrain is dàin a rinn Dòmhnall Iain Tair - an fheadhainn a tha cumanta fhathast, agus an fheadhainn a tha ma dh’ fhaoidhte airidh air barrachd urram agus mothachadh.