Â鶹Éç

Beagan bhliadhnaichean às dèidh do Cheitidh Anna NicChoinnich a bhith a Hiort ann a 1979, bha i air leth toilichte coinneachadh ri Lachlan Dòmhnallach, fear de bhalaich an eilein, a dh’fhàg Hiort air bòrd a’ bhàta Harebell, còmhla ris a’ chòrr den t-sluagh bho chionn 90 bliadhna, air 29mh den Lùnastal 1930. Bha Lachlan 24 aig an àm a chuir iad cùl ris an eilean. Bha triùir bhràithrean aige agus aon phiuthar's bha dithis de na bràithrean, Dòmhnall agus Aonghas air an t-eilean fhàgail tràth anns na ficheadan ‘s iad a’ sireadh cosnadh ann an Glaschu. Anns an t-seanachas a bh' aca tha e a' toirt dhuinn dealbh gu math mionaideach air beatha chruaidh air an eilean.

B' ann na pàiste a bha Criosaidh Chamshron nuair a chaidh ise Hiort còmhla ri pàrantan agus a piuthar Màiri ann an 1919. Bha a h-athair, Dòmhnall, a bhuineadh do Ghleann Eilg, air a ghairm ann na mhiseanaraidh agus b’ e ban-sgoilear a bha na màthair, Màiri Flòraidh NicCorcadail à Uibhist a Tuath. Ged nach robh an teaghlach ann ach seachd bliadhna bha cuimhneachain gu math soilleir aig Criosaidh air an ùine a chuir iad seachad air an eilean ann an còmhradh a bh' aice ri Crisdean Dillon ann an 1990.