Â鶹Éç

Dè bhuaidh a th’ aig a bhith a’ fuireach ann an dùthaich eile air d’ fhèin-aithne? Anns an t-sreath sa tha Coinneach Mac a’ Ghobhainn a’ tadhal air daoine air feadh na Roinn Eòrpa aig àm nuair a tha crìochan na Roinn Eòrpa air fàs nas caochlaidiche. An-diugh tha e ann am prìomh bhaile na Beilge agus prìomh bhaile an Aonaidh Eòrpaich: a’ Bhruiseal.

'S ann eadar a' bhaile seo agus Lunnainn a tha Eoghan Mitchison a' fuireach agus ag obair – air ais is air adhart thairis air crìoch ùr an EU. Ach cò ris a tha a' Bhruiseal coltach, agus dè na ceistean mòra mu fèin-aithne air a bheil na Beilgich a’ cagnadh?

Sa phrògram sa tha Eòghan a’ toirt dhuinn beachd air na sgìrean far a bheil sluagh le diofar chànain na Beilge a’ fuireach – agus mar a tha bun-reachd na dùthcha dha-rìribh toinnte. Cluinnidh sinn mar a tha trioblaidean agus buannachdan an cois inimreachas dhan a’ bhaile; na deasbadan cànain; strì cuid de Bheilgich airson neo-eisimeileachd agus Eòghan cuideachd a’ beachdachadh air cò ris a tha am baile coltach dha fhèin bho latha gu latha.