Â鶹Éç

Bha Gilleasbuig MacUalraig air fear dha na daoine mu dheireadh aig a robh Gàidhlig Bhaile a' Chaolais bhon a’ ghlùin. Thogadh e ann an Taigh a’ Phuirt , eadar Baile Chaolais agus Gleanna Comhainn, agus chuir e seachad a' chuid a bu mhotha de a shaoghal anns an sgìre, ag obair aig an fhactaraidh aluminium ann an Ceann Loch Lìobhain airson còig bliadhna deug thar fhichead.

B' e athair manaidseir na cuaraidh sglèata ann am Baile a' Chaolais, agus thog e iomadach sgeulachd, agus dual-chainnt bheartach na sgìre, aig glùin athar agus a mhàthar. B’ e a’ Ghàidhlig cainnt na cuaraidh sglèat agus bha sin dha fàgail gu math làdir sa choimhearsnachd an uair sin, ach dh’ atharraich sin nuair a dhùin an cuaraidh ann a 1955.

Bha ùidh mhòr mhòr aig Gilleasbuig ann an eachdraidh is dualchas na sgìre, agus bha e fad iomadh bliadhna os cionn Meur Loch Abar den Chomunn Gàidhealach, agus bha e cuideachd na Cheann-suidhe air an Fhèill Phan-Cheiltich.

B’ ann ann a 1990 a chaidh Crisdean Dillon a chèilidh air agus bha e ann am fonn òran neo dhà a bhuineas dhan sgìre a ghabhail dha.