Â鶹Éç

B' ann air iasgairean, croitearan agus muinntir na coimhearsnachd a bha obair Dhòmhnaill Mhic a' Ghobhainn stèidhichte; deilbh làn dath, faireachdainn agus blàths. Tha taisbeanadh dhen obair ealain aige, Eileanach, ri fhaicinn sa City Art Centre an Dùn Èideann chun 26mh den t-Sultain agus tha leabhar, 'Donald Smith, The Paintings of an Islander’ air fhoillseachadh le Acair.

Rugadh Dòmhnall Mac a' Ghobhainn ann a Newvalley, air bràighe Stèornabhaigh, ann a 1926 agus chaidh e a Sgoil Ealain Grays an Obar Dheathain. Bha iomadach taisbeanadh aige thairis air 50 bliadhna agus rinn e na ceudan de dheilbh, cuid nach fhaca duine gu seo. A thuilleadh air a bhith dèanamh ealain, bha e a' teagasg ealain ann a sgoiltean ann an Obar Dheathain agus air an tuath ann an Leòdhas. Thog e taigh cloiche agus stiùidio ann am Bràgar nuair a thill e dhachaigh sna 70an agus sin far na shaothraich e, ag èisteachd ri ceòl Gàidhlig, agus far na chruthaich e an dìleab a th' againn an-diugh.

Anns an dàrna prògram a' coimhead air obair, tha sinn a' cluinntinn bhuaithe fhèin ann an dà agallamh a rinn e sna 80an mu obair. Tha iad a tha a' toirt dhuinn sealladh air inntinn nach robh sguir ach a' smaoineachadh air dealbhan; ciamar a bha e dhan dèanamh agus na bha fa-near dha le bhith dhan dèanamh.

Tha a' chiad chòmhradh leis an sgrìobhadair Iain Moireach, aig taisbeanadh leis air an robh Càirdeas a bha san Lanntair ann an 1986. Tha an dàrna còmhradh leis an sgrìobhadair Tormod Caimbeul, Tormod a' Bhocsair aig an taisbeanadh Sùil Timcheall a bh' aige ann an 1989.