Â鶹Éç

Còrr air deich bliadhna air ais cha robh Cailean Seòras Moireasdan air sreap beinn dad na b' àirde na Muirneag neo beanntan Bharbhais ach abair gun do chur e dùbhlan roimhe fhein ann an 2012. Às dèidh post-dealan a thighinn thuige bhon charthannas Blythswood ag innse gun robh iad a' cur sgioba còmhla a ghabhadh pàirt ann an dùbhlan Beinn Kilimanjaro a shreap, cho-dhuin e gun robh e fhèin airson a dhol air an turas.

Às dèidh cuir roimhe gu robh e a' dol a dh’fheuchainn air Kilimanjaro a shreap, fhuair e mach gun robh aon duine eile air an eilean a bha an dùil an dùbhlan seo a ghabhail os làimh, balach às a bhaile aige fhèin, Aonghas Coinneach MacLeòid neo AK.

Bha ullachadh aca ri dhèanamh eadar trèanadh, a’ coiseachd bheanntan eile, a’ cruinneachadh airgid airson an turas le bhith a' nighe chàraichean – bha a 'shammy' a’ dol math! - agus cuideachd trang sa chidsin ag ullachadh brot is mìlsean a rèiceadh iad sa thalla. Mus do dh’fhalbh iad cha robh ach air an Cliseam a shreap, beinn anns a bheil còrr air seachd ceud gu leth meatair agus Kilimanjaro ochd tursan nas àirde na sin!

Seo mar a chaidh dhaibh air an turas ann an 2012.