Â鶹Éç

Tha 70 bliadhna bho thàinig am bàta Clan MacQuarrie air tìr le droch shìde air cladach Bhuirgh air taobh siar Eilean Leòdhais. Gheibh sinn na cuimhneachain aig Cathy Ann Mhoireasdain a bha ochd bliadhna a dh'aois aig àm na tubaist.

Mar a tha cùisean an-dràsta gheibh daoine peinnsean na stàit ann am Breatainn nuair a ruigeas iad aois 67 ann an 2028, agus 68 mun àm a thig 2046, ach tha an riaghaltas an-dràsta a’ sgrùdadh le beachd àrdachadh a-rithist. Ach a bheil daoine deònach a bhith ag obair gum bi iad faisg air 70? Gheibh sinn beachd thriùir air a' chùis.

Tha Buill Phàrlamaid ann a Westminster air taic a thoirt do bhile a tha a' moladh nach fhaod an luchd-obrach air fad ann an cuid de sheirbheisean poblach a dhol air stailc, ach gu feum gu leòr de luchd-obrach a bhith ag obair airson na seirbheisean a chumail a' dol. Theid tuilleadh sgrùdaidh a dhèanamh air a' bhile ann an Taigh nam Morairean mus bi e laghail. Mìnichidh Tòmas MacAilpein, a tha na bhall den aonadh an UCU agus a bha air stailc DiCiadain, na tha na h-atharraichean a' ciallachadh dha na h-aonaidhean-ciùird agus nì am fear-naidheachd, Aonghas Dòmhnallach, comas eadar mar a bha cùisean sna 70an 's na 80an agus mar a tha cùisean an-diugh le strì eadar an riaghaltas agus luchd-obrach airson àrdachadh pàighidh.

Chaidh leabhar ùr, Gun Sireadh, Gun Iarraidh - The Tolmie Collection, fhoillseachadh aig cùirm-chiùil Celtic Connections oidhche Haoine. Innsidh Ceana Chaimbeul dè a thug oirre ùrachadh a dhèanamh air an t-seann leabhran de dh'òrain 's de dh' fhuinn a bha Frances Tolmie air cruinneachadh.