Â鶹Éç

Mìnichidh an neach-naidheachd, Anna NicLeòid carson a tha mì-dhòigh anns a’ Phòlainn an-dràsta agus daoine draghail gu bheil an dùthaich a’ dol a chur cùl ris an Aonadh Eòrpach.

Chaidh Spycatcher, leabhar a sgrìobh fear a bha ag obair aig MI5, fhoillseachadh an toiseach ann an Àstralia ann an 1987. Ach, chuir Riaghaltas Bhreatainn bacadh air an leabhar a bhith air fhoillseachadh san dùthaich seo le eagal gun dèanadh e cron air obair an riaghaltais is MI5. Cluinnidh sinn bho Iain MacAmhlaigh gur ann air an latha seo, 13mh den Dàmhair, 1988 a bhuannaich pàipearan-naidheachd na dùthcha a’ chùis sa chùirt is chaidh an leabhar fhoillseachadh.

Chaidh a' ghainmheach agus am mòl a bha air uachdar seann raon-laighe aig port-adhair Thiorodh a threabhadh às ùr airson eòin a thàladh chun eilein. Seo an dàrna turas ann a fichead bliadhna a thachair a leithid. Ged nach eil pàirt mhòr dhen raon-laighe air a chleachdadh an-diugh, bha e gu math trang bho na 1940an, nuair a chaidh a leudachadh chun ìre agus gu robh Ionad Feachd Rìoghail an Adhair stèidhichte ann fad an Dàrna Cogaidh agus airson bliadhnaichean às dèidh sin. Gheibh sinn eachdraidh a' phuirt-adhair bho Iain Holliday, a sgrìobh leabhar air a' chuspair agus bho Ailig MacArtair, a thug bliadhnaichean ag obair na neach-smàlaidh aig a' phort-adhair.