Â鶹Éç

‘S e duine sèimh, dàimheil, aoigheil a th’ ann a Bob Macleòid, neo Murdie a’ Chidhe, neo - airson ainm baist a thoirt dha - Raibeart Murchadh Maclèoid à Brèascleit air taobh siar Leòdhais. Tha e an-diugh thairis air a cheithir fichead agus air an obair mu dheireadh a bh’ aige - ag ionnsachadh dhaoine mar a làimhsicheadh iad bàtaichean a bha ‘d a’ toirt a-mach air Loch Nis - a leigeil seachad ann an 2020. Ach cha robh sin ach airson an tìde a chur seachad dha, oir cha b’ urrainn dha a bhith dìomhain is e air na leth-cheud bliadhna ron a sin a thoirt an gnìomhachas a’ siubhal an t-saoghail, chan ann a mhàin na obair mar sgiobair air soithichean mòra ach ann an gnìomhachas na h-ola, nan itealan agus na heileacoptair ( a dh’ionnsaich e sgèith cuideachd ).

Mu dheireadh bha e os cionn Puirt-adhair na Gàidhealtachd ‘s nan Eilean agus fhuair e OBE airson an obair a rinn e ann an gnìomhachas nan itealan.

B’ ann an Taigh a’ Chidhe - a bha dhà na trì cheudan slat bho chidhe Bhrèascleit – a thogadh e agus bu bheag an t-iongnadh a-rèisd, nach robh fad sam bith gus an deach a mhiann a dhol gu muir a dhùsgadh mar a tha e ag innse do dh' Annella Nicleòid.