Milwr wedi marw yn ystod ymarfer yng Nghrucywel
Bu farw'r Corporal Christopher Gill yn Aberhonddu ddydd Mercher, yn ôl y Weinyddiaeth Amddiffyn
- Cyhoeddwyd
Mae milwr wedi marw yn ystod ymarfer milwrol ym Mhowys, mae'r heddlu wedi cadarnhau.
Bu farw'r Corporal Christopher Gill o'r 4ydd Bataliwn, Catrawd y Marchfilwyr yng Nghrucywel, ger Aberhonddu ddydd Mercher.
Dywedodd Heddlu Dyfed-Powys eu bod wedi cael gwybod am farwolaeth Cpl Gill toc wedi 01:00 fore Mercher a bod ymchwiliad ar y gweill gyda chefnogaeth y Gweithgor Iechyd a Diogelwch
Mae'r milwr oedd yn cael ei nabod fel Gilly wedi'i ddisgrifio fel "milwr Gweithrediadau Arbennig rhagorol".
"Mae ein meddyliau gyda'i deulu ar yr amser hynod anodd hwn," ychwanegodd y Weinyddiaeth Amddiffyn ddydd Sul.
Fe ymunodd â'r Fyddin yn 2011, a chael ei anfon yn y lle cyntaf i dalaith Helmand yn Afghanistan, ble y bu'n hyfforddi "partneriaid arbenigol" maes o law.
Fe wasanaethodd hefyd yn Belize, Unol Daleithiau America, Kenya a Moroco cyn gwirfoddoli yn 2021 ar gyfer Gweithrediadau Arbennig y Fyddin.