Y Gaer
Mae'r hen gastell ar y graig
dan orchudd y niwl yn cuddio,
a Bendigeidfran ar y tŵr
yn y glaw mân yn gwylio'r
hwyliau diarth yn agosáu
a'u lliwiau drwy'r tonnau'n gwau.
Mae'r brain yn crawcian yn y coed
yn herian y gwylanod,
a gwynt o'r môr yn mynd i hwyl
yn chwipio'r twyni tywod:
yn gadael ôl yr ewyn hallt
yn stribedi gwynion yn ein gwallt.
Daeth arwr newydd drwy'r strydoedd cul,
a'r ddraig ar ei faneri,
a sŵn pedolau ar y cerrig mân
a'i fyddin o yn gweiddi -
"peidiwch llusgo'ch traed, fe ddaw y dydd
pan fydd y Cymry'n Gymry rhydd!"
 |
