Â鶹Éç

"Rydw i'n fyfyrwraig ail flwyddyn yn astudio Hanes a Hanes Cymru ac yn dod o Grymych yn wreiddiol.

Ddes i i Fangor am fy mod i'n hoffi'r cwrs ac am fod yr ardal mor bert - ddes i yma i'r diwrnod agored a cw'mpo mewn cariad gyda'r lle.

Fe ges i gymaint o help gan fy arweinydd cyfoed i yn y flwyddyn gynta pan gyrhaeddais JMJ [Neuadd John Morris Jones - y neuadd preswyl Cymraeg], fe wnes i a fy ffrindie benderfynu ein bod eisiau helpu pobl eraill yn yr un ffordd, felly fe es i'r cyfarfodydd hyfforddi.

Rydyn ni yno i helpu pan mae pobl yn cyrraedd y coleg am y tro cyntaf - yn rhywun i ddweud helo, jyst rhywun i wenu ac iddyn nhw ei adnabod. Mae rhai yn dod yma heb adnabod neb ac mae'n gallu bod reit daunting - dim ond un person ro'n i yn ei adnabod pan ddes i yma gyntaf.

Er mai dim ond blwyddyn yn iau na fi ydy'r myfyrwyr newydd, mae gweld rhai ohonyn nhw'n cyrraedd yn gwneud imi deimlo'n hen! Mae'n gallu bod yn gyfnod bach anodd ond gan ein bod ni wedi bod trwyddo fe, rydyn ni'n gallu helpu.

Rydyn ni'n mynd â chriwiau allan ac yn trïo eu cael i ddod i adnabod pobl eraill. Fe es i â chriw o JMJ allan ar y Crôl Teulu neithiwr (nos Fawrth) - roedd gen i ryw 8 o fyfyrwyr newydd yn fy ngofal ac roedd yn neis eu gweld yn dechrau siarad â'i gilydd a dod i 'nabod ei gilydd.

Aethon ni i weld Glyn 'Big Brother' yn Time - fe ges i hyg a sws ganddo fo ac mae gen i lun ar fy ffôn! Bues i'n ciwio am awr a hanner i'w weld ac mi dd'wedais i wrtho mod i wedi pleidleisio drosto 37 o weithie!

Rydw i'n arweinydd cyfoed yn JMJ a hefyd yn yr adran hanes, felly mae gen i ddewis helpu gyda gweithgareddau'r neuadd neu'r adran. Fe wnes i ddewis JMJ neithiwr. Rydw i'n byw yno eto eleni. Rydw i wrth fy modd gyda JMJ - er bod lot o bobl ddim yn hoffi'r lle. Mae 'na gymdeithas mor agos yno ac mae pawb yn dod 'mlaen. Mae'n od i ddechre ond erbyn diwedd y llynedd gallen ni enwi pawb oedd yn byw yno. Mae'r neuadd yn llawn eleni gyda 199 o fyfyrwyr yn byw yno.

Rydyn ni'n gwisgo Crysau-T melyn llachar ac felly rydyn ni'n hawdd ein ffeindio ac mae'r myfyrwyr sydd yn ein gofal ni yn cael ein rhifau mobeil a'n rhif ystafell rhag ofn bod angen cysylltu.

Heddiw (dydd Mercher) rydw i yn y Ffair Fodiwlau, lle mae pawb yn cofrestru, yn helpu gyda myfyrwyr yr adran hanes - gwneud yn siŵr bod popeth yn iawn a bod ar gael i 'checio' ffurflenni ac yn y blaen. Neu os ydy rhywun eisiau gofyn am un o'r modiwlau rydw i wedi eu gwneud, fe alla i roi cyngor."