Â鶹Éç

Taniwyd ei ddiddordeb mewn pêl-droed gan ei dad a oedd yn 'ffanatic' pêl-droed ac wedi chwarae i nifer o dimau lleol. Ond pam fod yr ardal wedi meithrin cymaint o bêl-droedwyr mawr a dilynwyr brwd?

Dywedodd Steven mai un rheswm dros y ffaith fod yr ardal yn gadarnle i'r gamp ydy, yn syml, ei bod yn ardal mor boblog. Yn ogystal, mae'n agos iawn at Lerpwl a Manceinion: dinasoedd y mae pobl y sir wedi hen arfer â mynd iddynt i fwynhau gwylio rhai o chwaraewyr gorau'r byd.

Ond un o'r rhesymau pennaf am lwyddiannau'r ardal ym maes pêl-droed yn ôl Steven, ydy bod strwythur hyfforddi o'r radd flaenaf yn y sir, o fewn addysg uwchradd ac, yn arbennig, cynradd. Enwodd fawrion fel Tony Norman, Kevin Ratcliffe, Michael Owen, Barry Horne ac Ian Rush fel enghreifftiau o chwaraewyr a fanteision o fod yn rhan o strwythur ysgolion cynradd y sir.

Ac nid tuedd ddiweddar ydy hon - wrth ymchwilio daeth Steven Jones ar draws y chwaraewr Everton, TG Jones o Gei Cona, a oedd yn chwarae cyn ac ar ôl yr ail ryfel byd a ddisgrifiwyd gan neb llai na Dixie Dean fel y chwaraewr cyflawn gorau a welodd erioed.

Soniodd hefyd am Roy Vernon o Ffynnon Groyw, rhywun y clywodd ei dad a'i gyfeillion yn rhyfeddu at ei ddawn lawer gwaith ond na chafodd Steven erioed gyfle i'w weld yn chwarae ei hun. Arwyr lleol eraill mwy diweddar ydy Gary Speed, sy'n parhau i chwarae yn yr uwch-gynghrair yn 37 oed ac, wrth gwrs, Ian Rush, mab i weithiwr yng ngwaith dur Shotton o dre'r Fflint, a wnaeth fwy na neb i roi pêl-droed Cymru ar y map.

Argymhellodd Steven hefyd bod unrhyw un sydd â diddordeb ym mhêl-droed Fflint yn mynd i weld arddangosfa am hanes Cymdeithas Cynghrair Ysgolion Cynradd Sir y Fflint yn Ysgol Gynradd Bryncoch yn yr Wyddgrug.

Traddododd Steven Jones ei ddarlith yn y Babell Lên yng nghwmni Moi Parri, rheolwr Clwb Pêl-droed y Glannau a'r sylwebydd pêl-droed Nic Parry.