Â鶹Éç

Bu Deddf Mwyngloddiau 1842 yn gyfrwng i wahardd gwragedd, genethod a bechgyn dan 10 oed, rhag gweithio dan ddaear yn y mwyngloddiau.

Ar ôl ymgyrch hir, cyfyngodd Deddf Ffatrïoedd 1874 hyd y diwrnod gwaith i ddeg awr.

Gwrthododd rhai gwÅ·r busnes y newidiadau hyn gan ddweud eu bod nhw'n cynrychioli ymyrraeth ar ran y llywodraeth.

Ymdrechodd eraill o blaid y ddeddf, gan geisio rhoi terfyn ar y niwed oedd yn cael ei wneud i wragedd a phlant.

Mae llyfrau log ysgolion lleol yn dangos bod y deddfau newydd yn cael eu diystyru.

Roedd y Wrecsam Fictoraidd yn awyddus i hyrwyddo masnach.

Ar 22 Gorffennaf 1876, daeth Dug a Duges Westminster i'r dref i agor 'Arddangosfa Trysorau Celf a Diwydiant Gogledd Cymru', sef arddangosfa dros gyfnod o bedwar mis, ar lun yr arddangosfeydd mawr a gynhaliwyd yn Llundain a Glasgow, i ddathlu celfyddyd a dyfeisgarwch.

Mae'r fynedfa i'r neuadd arddangos, sef Adeiladau Westminster, yn sefyll hyd heddiw yn Stryt yr Hôb yn Wrecsam.

Roedd pum-deg-un o stondinau busnes, ynghyd â mwy na 900 o weithiau celf a 2,300 o arddangosion eraill, gan gynnwys gwaith metel, crochenwaith, porslen, hynafiaethau, cerflunwaith a thecstilau, yn cael eu harddangos.

Ymgorfforiad arall o'r deisyfiadau masnachol a ddaeth i'r amlwg yn 1888 oedd agoriad swyddogol Ysgol Gwyddoniaeth a Chelfyddyd Wrecsam.

Roedd y ganolfan hon yn cynnig hyfforddiant galwedigaethol, gyda chyrsiau mewn adeiladu ac adeiladwaith, peirianneg fecanyddol, lluniadu technegol, cemeg a mathemateg.