Chwilio am Arthur
Nofel wedi ei gosod yn y flwyddyn 2050 yw llyfr diweddaraf Eurgain Haf.
Erbyn hynny mae Cymru mewn trafferthion amgylcheddol dybryd a'r bae yn boddi, y Senedd yn suddo a chwareli'r wlad wedi eu troi'n ffatrïoedd i chwalu cof y Cymry o'u gorffennol.
Diflannodd Ynys Môn yn llwyr a "De Orllewin Prydain" yw'r enw ar Gymru bellach ac mae ffyrdd uwchddaearol yn cael eu hadeiladu fel bod pobl yn gallu osgoi Cymru yn llwyr.
Cyhoeddir y nofel yng nghyfres Strach gan Wasg Gomer ac mae wedi ei hanelu at blant rhwng 7 ac 11 oed.
Ond er wedi ei gosod yn y dyfodol mae adlais hen chwedl ynddi hefyd gan mai'r un dyn â all helpu bellach Cymru o'i strach ydi'r Brenin Arthur.
Ef yn dal i ddisgwyl am yr alwad i achub ei wlad.
Ond pwy sy'n mynd i ddod o hyd iddo a sut?
Wele Llwyd Dafydd yn camu mlaen. Mae o'n byw "gyda'i ewythr a'r pryfed lludw" yn nhyddyn Porth Afallon a than orchymyn Jac Offa, Prif Weinidog newydd Prydain, mae swyddogion y llywodraeth yn cymryd camau'n barod i chwalu'r tyddyn er mwyn adeiladu ffordd uwchddaearol er mor benderfynol yw Ewythr Bedwyr i beidio gwerthu.
O Benisa'rwaun, Gwynedd, y daw yr awdur ardal â chysylltiadau clos â'r Brenin Arthur .
"Mae'r nofel hon wedi ei hysbrydoli gan fy mhlentyndod a'm magwraeth yn Eryri, ardal sy'n frith o chwedlau a choelion am dylwyth teg, corachod, cewri, twneli tanddaearol a chysylltiadau Arthuraidd," meddai.
"Yn blentyn, treuliais sawl awr yn chwilio'n ddyfal gyda'm ffrindiau am dwneli tanddaearol ac olion y tylwyth teg ac er na ddois i fyth o hyd iddyn nhw, y gobaith yw i mi danio fy nychymyg ar hyd y daith."
Llyfrau ffantasi
Ychwanegodd ei bod wrth ei bodd yn darllen llyfrau ffantasi fel Harry Potter a The Lord of the Rings.
Yn Yr Allwedd Aur mae llawer o elfennau'r straeon hynny; pwerau tywyll Gedon Ddu sy'n benderfynol o ddinistrio Cymru, y Meidrolfyd a'r Hudfyd rhyfedd.
"Mae Yr Allwedd Aur yn annog y darllenydd i fentro ar daith arbennig iawn - taith lle nad yw popeth yn ymddangos fel y dylai. Taith rhwng dau fyd, y Meidrolfyd a'r Hudolfyd," meddai'r cyhoeddwyr.
