Yn symol eto - am y tro olaf
A dyma'r casgliad olaf o ffigurau difyr/diddorol/diflas/di-fudd/dibwrpas - croeswch allan i siwtio'ch pen y bore ma - o faes Y Bala:
20,178 - o ymwelwyr a'r Eisteddfod ddoe, dydd Sadwrn.
164,689 - o ymweliadau â'r maes yn ystod yr wythnos.
Mae rhai'n dweud 'o bobol ' ond fyddai hynny ddim yn gywir gan i rai cannoedd ymweld fwy nag unwaith. Ond fe fyddai'n ddiddorol gwybod sawl unigolyn ymwelodd â'r Ŵyl yn ystod yr wythnos. Rhywbeth i Ms Carr, yr aelod newydd o Tîm Steddfod, ei wneud i'n helpu y flwyddyn nesaf efallai.
300 - o stondinau ar y maes.
90 - awr o deledu byw o'r Steddfod yn ystod yr wythnos.
5 - milltir o bapur tŷ^ bach a ddefnyddiwyd yn ystod yr wythnos - yn ôl y Wales on Sunday heddiw. Ac rwyf i, o leiaf, yn hynod anniolchgar iddo am ymgymryd â'r ymchwil a ddatgelodd hyn.
5 - cystadleuaeth lle bu atal y wobr.
830 - o garafanau ar y maes carafanau.
7 - gwaith oedd y nifer fwyaf o weithiau y cefais fy neffro yn fy ngwely berfeddion nos gan sŵn Maes B i fyny'r lôn.
0 - o straeon newyddion am yr Eisteddfod yn y Wales on Sunday - Pride of the Nation heddiw.
Ymddiheuriad: oherwydd cyfyngder lle ar y we fyd eang a diffyg darn o bapur digon hir nid oes digon o ofod ar y safle hwn i gynnwys y ffigwr sy'n nodi faint o oriau fydd S4C yn eu hailddarlledu o'r Eisteddfod hon dros y flwyddyn nesaf.
